Pages

ع الأصل دوّر


إقتراح و دعوة لجميع المدونين

حملة إسمها

ع الأصل دوّر

هي عبارة عن إن كل مدوّن يكتب بوست عن الحي إللي عاش و إتربى فيه وهو صغير

ويحكي لنا عن الشوارع و الناس و حكايات الحي ده

ومن منطلق إبدأ بنفسك

أنا بأفتح الباب


الظاهر

حي البهوات و الأفندية قبل الثورة

وحي الأفندية و كبار العمّال بعد الثورة

وحي أي حد بعد الإنفتاح

إسم حي الظاهر نسبة للظاهر بيبرس ، لأن في الحي ده موجود جامع الظاهر بيبرس ، وإللي إحنا – أبناء الحي – بنقول عليه مدبح الإنجليز ، وده لأن زمان أيام الإحتلال الإنجليزي لمصر ، كانت القوات المحتلة قفلت الجامع و حولته لمدبح عجول و مواشي و خرفان ، و فضلوا يستخدموه بالشكل ده سنين طويله ، لكن أهالي الحي إستمروا يقيموا شعائر الصلوات حوالية بالعند فيهم ، ولما غاروا في ستين داهية رجع الجامع تاني يستخدم للصلاة و العبادة ، لكن فضلنا إحنا أبناء الحي نقول على ميدان الظاهر والموجود في وسطة الجامع ، ميدان مدبح الإنجليز .

شوارع الحي ده غريبة قوي في أسمائها ، لأن كل الشوارع في كل حته في مصر بتكون بأسماء أشخاص مكونة من أسمين أو ثلاثة وساعات صفاتهم كمان ، زي مثلا شارع البطل أحمد عبد العزيز ، أو شارع عبد المنعم رياض ، إنما في حي الظاهر ، أسماء الشوارع أغلبها من أسم واحد ، زي مثلا شارع حمدي أو شارع زكي أو شارع جعفر أو شارع زهني ، وحتى الميادين ، زي ميدان فخري مثلا ، وحتى الشوارع الكبيرة الرئيسية ، زي شارع الظاهر وشارع الجيش ، ونادر لما يكون فيه شارع من إسمين زي مثلا شارع أحمد سعيد ، أو شارع قنطرة غمرة .

كمان في الظاهر معابد يهودية وأنقاض معابد يهودية كتير ، وفيها كمان المدرسة الإسرائيلي ، وإللي حاليا هي المدرسة الثانوية الفنية ، وده لأن الطائفة اليهودية في مصر كانت متمركزة في منطقة الظاهر بشكل أساسي .

القهاوي في الظاهر مشهورة بحاجتين مهمين جدا ، القرفة بالحليب ، والشاي بالحليب ، وكفاية نفتكر أغنية محمد فؤاد " يعني إيه كلمة وطن " لما بيقول فيها ،، شاي بالحليب على قهوة في الظاهر هناك ، نسمة عصاري السيدة ودير الملاك ،، وطبعا لازم نقول إن الظاهر مليان قهاوي لدرجة إن بين كل قهوة و قهوة فيه قهوتين وقهوة لسه حاتتفتح ، بس كل القهاوي القديمة محتفظة بالترابيزات الرخام القديمة ، إنما الجديد بقى ، متبني نمط الكوفي شوب .

في الظاهر كمان شارعين تجاريين كبار جدا هما شارع بورسعيد وشارع الفجالة ، وطبعا مش محتاجين نقول أد إيه هما شوارع تجارية مهمة في القاهرة ، وعندنا كمان شارع الجيش ، وده شارع بجد كأنك جوة كتاب تاريخ لما تمشي فيه ، عمارات كلها قديمة ، مشربيات و بلاكونات على الطراز الإنجليزي و الفرنسي ، بس طبعا يعلوها التراب و الإهمال كالعادة .

ندخل بقى على قصر السكاكيني ، أجمل تحفة معمارية في الحي ده ، ويمكن من أجمل التحف المعمارية في مصر ، قصر مبني وسط ميدان تتفرع منه ثمانية شوارع ، وكأن القصر قرص الشمس و الشوارع هي أشعتها ، تماثيل و منحوتات وزجاج معشق و فسيفساء و قول زي ما تقول في أنواع الفن الموجودة في القصر ده ، السور الحديد بتاع القصر بس ، يعتبر تحفة فنية ، بجد من أجمل التحف الفنية المهملة طبعا في مصرنا الحديثة .

نيجي بقى لآخر حاجة و أجمل حاجة في الظاهر ، وهي الناس ، تقريبا كل أهل الظاهر القدام يعرفوا بعض ، وصعب جدا إثنين من جيل واحد يكونوا مايعرفوش بعض ولو حتى بالشبه ، الغريب إن أهالي الحي ده بيعتبروا الظاهر ده وطن ، يعني تلاقي واحد يقول للثاني ، إنت من الظاهر ؟ والثاني يرد يقول له آه ، فورا يبقوا أكثر من الأخوات ، وتبدأ بينهم مودة جامدة بسرعة البرق ، ناس الظاهر كمان عندهم سوق شارع حمدي ، وهو سوق خضار و فاكهة ، أجمل و أغلى من سوق التوفيقية ، وبيفتخروا بيه جدا ، بس بينهم و بين بعض ، ولفترة طويلة كانوا بيعتبرو السوق ده هو سرّهم المقدس ، إللي مايصحش إن أي حد من بره الحي يطلع عليه ، ومن هناك ممكن تاكلوا فواكه ، أجمل من أي مكان تاني في مصر ، كمان أغلب أبناء الظاهر حاتلاقيهم متخرجين من مدارس راهبات أو رهبان ، زي المارونية و الكولاج دي لاسال و البطريكية و السيكريكير و سان فان سان دي بول ، وده مالوش دعوة بالحالة المادية ، لأن المدارس دي زمان كانت مش غالية لكن بتشترط التفوق و الأخلاق ، إنما دلوقت الوضع طبعا مختلف .

علشان كل إللي فات ده ، أنا حتى هذة اللحظة لما بأدخل حي الظاهر ، بأحس بدفء و أمان أكتر من أي مكان تاني ، ورغم كل التغيير الكبير إللي حصل هناك ، إلا إني دايما بأشتاق للحي ده ، وللشوارع إللي لعبت فيها وأنا صغير ، وعملت فيها مصايب طفولة مالهاش عدد .

وبجد إللي عايز يشوف الوحدة الوطنية بين المسلمين و الأقباط و بصورة واضحة جدا ، يجي يزور حي الظاهر ، حايلاقي هناك مصر بتاعت زمان .

23 comments:

ستيته حسب الله الحمش said...

دعوة رائعة جدا
بس نجيب كلام جميل كده منين؟
واضح ان الضاهر منطقة حلوة وفعلا فيها دفا
مش انت اول واحد اسمع منه الكلام ده عنها

بالمناسبة مدارس الراهبات هناك لسه مش غالية
وهي احسن تعليم في مصر لحد دلوقت
وصاحبتي وابنها وبنتها الأتنين هناك وعلشان كده انا عارفة انهم مش غاليين بالنسبة للغات والإنترناشونال خالص

تحياتي على الرحلة اللي اخدتني فيها جوا حي طفولتك
بس محكيتش عن نفسك انت شخصيا هوناك
اصلي عاوزة اعرف طبيعة "مصايب" الطفولة كانت واصلة لحد فييييييييييين؟

فاتيما said...

آه ه ه ه ه
يا وليد

دا الحى اللى عايش فيه
يوسف دلوقتى

تصور !!


على فكرة انا عندى كتاب
اسمه القاهرة فى الف عام
اتعمل بالمناسبة دى سنة 1969
و مليان صور لمصر و احيائها


من ضمن الصور
صورة من الجو لحى السكاكينى ...
و فعلا مش بهزر و زى انت ما وصفت

المنظر زى الوردة تمام
قلبها قصر السكاكينى
و الشوارع متفرعة منه
بين كل شارعين مثلث
مليان عمارات كأنه ورقة شجر

شكله من فوق تحفة ...
الناس زمان كانت بتعرف تخطط
و تعمل حاجات حلوة مش زى دلوقتى
ذوق مفيش

سمعت عن إن جنينة القصر
لحد التلاتينات كان فيها غزلان متربية و الناس كانت بتقعد تتفرج
عليها من برا السور

كنت بتمنى ادخل يوسف مدرسة
من مدارس الحى دا
لأنى بسمع عن سمعتها الممتازة


بس للأسف نصيبه جه
فى مدرسة حكومة
و ربنا يصلحله الاحوال


انا حبيت الضاهرزمان
و بعدين كرهته
بسبب اللى شفته
من ناس معينين هناك
انت تقدر تخمنهم طبعا


لكن بعد ما عرفت انك
ضاهرى المنشا
هغير رأيى
و احبه من تانى


حلوة الفكرة قوى
تسلم افكارك

bos bos بسمه عبدالباسط said...

أحم أحم

بما أنى مش شايفة حاجة حاليا بس ناوية أكتب بوست عن فكرتك بس روح عندى فى اخر موضوع جايبة سيرتك

:))

هي وظروفها said...

اولا اذيك يا استاذ وليد ايه الفكره الجامده دي عارف تحس كده انها ادب رحلات
بس داخلي مش خارجي منت عارف ان الخارجي مش بتاعنا احنا بتوع الداخلي علي قد ادينا

فكرتك حلوه بس هو المفروض او اللي انت تقصده كل واحد يكتب بوست عنده عن منطقته ولا تعليق فقط عندك ارجو التوضيح

وليد الدوغري

واحدة مفروسة said...

و نسيت مدرسة السانت آن
و الاميريكان كولدج
:)

KING TOOOT said...

ستيتة حسب الله الحمش
مبسوط جدا إن الدعوة عجبتك يا دكتورة ، ومستنيين البوست بتاعك ضمن حملة ع الأصل دوّر
وبخصوص موضوع مصايب الطفولة ، خليها في سرك بقى لأنها حاجات مهببه و مصايب بجد
خالص إحترامي و تقديري
_______________________
فاتيما
يا ستي إن شاء الله تنتهي ضيافة الظاهر ليوسف على خير و يرجع لك بالسلامة و بإذن الله تلحقي تدخليه مدرسة من مدارسنا كمان
كلامك كله صحيح عن حي السكاكيني و عن القصر
الظاهر حي زي كل الأحياء فيه ناس كويسة وناس مش كويسة ، وإذا كان حظك كان وحش مرة مع ناس معينين ، فإن شاء الله نقدر نغير رأيك
أنا ميسوط جدا إن عجبتك الفكرة ، يلا بقى بلغيها لكل الناس
بسرعة
علشان نقرأ بوستات في مدونات كل الناس و نعرف كل واحد أصله من أي حي
خالص مودتي و تقديري
_____________________
بسمة عبد الباسط
حااااضر
رايح أهه
ربنا يستر
أوعي تكون شتيمة
ههههههههههههه
ولا مقلب
هههههههههههه
سلام ، أقابلك عندك في مدونتك
______________________
هي وظروفها
أنا أقصد إن كل واحد يكتب بوست عنده في مدونته عن الحي إللي إتربى فيه وعاش طفولته و شبابة فيه
وفعلا يا وليد هو أدب رحلات بس أقرب لأدب الذكريات ، يعني تقدر تقول مزيج بين وصف المكان ووصف المشاعر
أشكرك على إهتمامك ومستني أشوف البوست الخاص بيك
تحياتي
______________________
KING TOOOT

KING TOOOT said...

واحدة مفروسة
أنا مش ناسيهم بس أنا ماقلتش في البوست كل المدارس ، أنا بس أعطيت أمثلة
لكن لو على باقي المدارس
فعندك بقى زي ما أنتي قلتي
السانت آن
و الأمريكان كولدج
وكمان
القلب المقدس
وسان جوزيف
والعائلة المقدسة
والديبرازير
و السان سانتيمون
و رمسيس كولدج
ونيو رمسيس كولدج
كفاية كده ولا أقول كمان ؟؟
على فكرة أنا أختي كانت في السانتان
وأنا كنت في المارونية
واضح إنك من الظاهر
إعترفي
صح ؟
تحياتي يا بنت منطقتشي
___________________
KING TOOOT

Muhammad Saber Abdou said...

فكرة لطيفة جداً

وذكريات حلوه

تحياتي

Wanda said...

حلو صحيح
وصف كان الواحد شايف قدامه و حاسس بيه
جتمع الظاهر بيبرس لفت انتباهى اكثر من مرة و انا راكبة الاتوبيس للكلية
اصلها مش بعيدة الناحية الثانية فى جاردن ستى
مش كده هى قريب و لا انا الاتوبيس لف بيا كثير :-)))

بصى يا سيدى الفاضل
انا من مصر الجديدة
اتكلمت عنها بطريقتى الغير بلاغية
لان استاذ وليد بتاع عارفة مش عارف ليه :-)) اتكلم عن وسط البلد
و قومها فى بالى احكى عن مصر الجديدة ادى اللنك
http://wanda-wanderer.blogspot.com/2009/12/blog-post_3850.html

KING TOOOT said...

Muhammad Saber Abdou
أشكرك على زيارتك
وتعليقك
________________________
Wanda
لا يا واندا
الظاهر مالهاش علاقة بجاردن سيتي
الظاهر حي مابين ميدان رمسيس و ميدان العباسية
بيضم مناطق
الفجالة
والقبيسي
والسبع
والسكاكيني
وغمرة
والقبة الفداوية
والفردوس
والبعوث
ومن يمينه شارع رمسيس بعد ميدان رمسيس
ومن شمالة شارع الجيس بعد ميدان الجيش
أهه خريطة كاملة يا ستي
علشان الأتوبيس مايضحكش عليكي تاني
أشكرك على تعليقك و على البوست الجميل في مدونتك عن مصر الجديدة
خالص شكري و تقديري
_______________________
KING TOOOT

Wanda said...

يعنى تهت برضه :-))))
بس انا شوفت الجامع الى فى الصورة ده
يبقى عديت عندك اكيد

خلاص المرة الجاية ابقى انزل بالخريطة زى الخواجات و الف براحتى

واندا متخصصة توهان :-)
شكرا على الارشاد
على ان كلامى لمصر الجديدة عجبك
ياريت الاقى حد يوصفها بكلام حلو
كنت جبتلك منه فقرة

reem said...

حلوة اوى الدعوة دى يا استاذ وليد

كلامك عن الضاهر شدنى جدا وخلانى نفسي اشوفها

انا للاسف مش اعرف كتير مناطق في القاهرة

وبتمنى اوى اوى اشوف المناطق العريقة دى

بحس ان هذه الاماكن تحمل في طياتها عبق التاريخ

انا صحيح عشت عمرى كله في الرساض بالسعودية بس انا من مصر الجديدة
واعشق هذا الحى عشقا لاحدود له

سلامى كتييييير لبوبو

bos bos بسمه عبدالباسط said...

جاءنا البيان التااااااالى

السبت الجاى هاجى القاهرة

آن آن آآآآآآآآن

حفل توقيع كتاب تعيش وتاخد غيرها لسحر غريب والضرب فى الميت لأحمد الصباغ الساعة 4 فى سراى كندا دار ليلى

وأنا هبقى فى المعرض من الساعة 2 كده

عايزة اشوفكم بقى

:))

Wanda said...

بص بقى اقومك على اصحابك بقى
بسمة متدخلش القاهرة الا لما تكتب بوست عن المنطقة بتاعتها و تبعتلك الرابط
اشمعنى انا سمعت الكلام ؟؟؟

انا يا عمنا متعرفتش الا على وسط البلد من استاذ وليد و الظاهر منك برضه يا استاذ وليد
انا توهت هو فيه كام وليد ؟؟

المهم شوقتنى انكش عن الظاهر بيبرس
قرات مرة عنه حاجات خلتوه يصعب عليا
الناس مش فكراله الا الوحش و الحلو الى عمله و سابه محدش فاكره
ادى حال الدنيا

دنيا :-(

القدر و انا said...

وليد
حقيقى معلومات قيمة جدا
السنوات القليلة اللى عشتها فى القاهرة رحت حى الظاهر وطبعا ش الجيش وش بور سعيد انما وصفك الدقيق فسر جزء تاريخى مهم عن عراقة هذا الحى لم اكن اعلم به
تحياتى لتوضيحك البدبع

KING TOOOT said...

Wanda
إن شاء الله مش حاتتوهي ولا حاجة ، وبلاش موضوع الخريطة ده ، أصل في الظاهر حاجات كتير مش على الخريطة أصلا
هههههههههههه
كلامك عن مصر الجديدة جميل فعلا ، ومش محتاجة تستعيري فقرات من حد
تحياتي
________________
reem
مبسوط جدا إن الدعوة عجبتك ، وأتمنى أننا نقرأ عندك بوست ضمن الدعوة إن شاء الله ، وتكلمينا عن الرياض أو الحي إللي بتسكنيه هناك
مش لازم الحي يكون في مصر
ممكن في أي بلد
خالص تحياتي
وسلام مخصوص من بوبو
_________________
بسمة عبد الباسط
لا يا شيخة
طيب خدي بقى البيان العاجل ده
يوم السبت الجاي حانكون أنا و بوبو و عمر في أغوار الصعيد الجوّاني
علشان حانكون في البلد
أخنقك بقى و أرتاح منك ؟
_________________
Wanda
أنا بلغت دوريات الطريق الزراعي يقبضوا عليها أول ما تدخل حدود مدينة القاهرة
يعني عند ميدان المؤسسة كده
ههههههههههههههه
وبخصوص الظاهر بيبرس فهو الحقيقة إختلف عليه المؤرخون
ناس قالوا مظلوم وناس قالوا ظالم
والله أعلم
_________________
القدر و أنا
أشكرك على زيارتك
وأشكرك على تعليقك
وأشكرك على مجاملتك الرقيقة
نورتيني
_________________
KING TOOOT

ـ-ـ- أحمد عبد العدل-ـ-ـ said...

سلام عليكم ياملك
أنا شفت البوست أول ما نزل و من ساعتها و أنا محتار جداً ،،،، يمكن حى زى الظاهر سهل تكتب عن تاريخه فما زالت به بعض الأماكن التى تحكى عنها ،،، أما أن تكون مسقط رأسك قرية لم يتبق منها ما يذكرك بعشر سنوات فقط مضت غير اسمها ،، تصبح الكتابة عنها من أصعب المهام
على أى حال حضرتك بتتحمل ذنب الناس اللى هتقرا الموضوع ،، اللى اضطريت أحذف أكتر من نصه محاولاً تجميل الصورة قدر الإمكان
http://abdeladl.blogspot.com/2010/02/blog-post.html
دعوة رقيقة زى صاحبها و تطبيق للدعوة زى صاحبه برضو هههههههه

دايماً سباق و داعية لكل الخير
دمتَ بكل الخير و السعادة

ghada mOhsen said...

الله بجد فكره حلوه ...

وكده الواحد راح يستفيد كتير عن اكتر المناطق اللى بمصر

حلو كتير وصفك وكلماتك حسيت وكأنى زرت المكان ده

انا مشكلتى بقى انى كنت فى كذه حته
يعنى فى الاول فى السعوديه فى الرياض وبعدين باليمن فى صنعاء وخلال القترتين دول كنت اجى على مصر
شايف اللخبطه ههههههه

بس بعد مااخلص امتحانات ان شاء الله راح اعمل بوست على كل مكان حسيت انى نشأت فيه

بجد تسلم
... ;) ,,, ;) ...

medo said...

انا قريت الموضوع ده بقلبي مش بعنيا

لو تكلمت هذه الأطلال لحكت ما رأته في زمن قد ولي


انا حاسس ان الشارع ده بيقول مش ده زمني

شوف كام راجل وكام فتوة عدا علي المكان ده

medo said...

تووووت انابعد ما قريت البوست ده خلاص

نويت انزل معرض الكتاب ان شاء الله بكرة

ياريت الزمن ده يرجع من تاني

فاتيما بيقول ان كان في جنينة القصر غزلان

مش عارف كل مظهر بيحكي عن اصالة البلد اللي احنا فيه دي بيشيلوه ليه


كل حاجة حلوة بتتبدد مش فاهم ايه اللي غير مصر كده

علي فين يا مصر

from egypt said...

ممكن أتشرف بزيارة حضرتك وأعرف رأي حضرتك في مدونتي

: علي هذا الرابط

http://andthisismyway.blogspot.com/


والسلام عليكم ورحمة الله

KING TOOOT said...

أحمد عبد العدل
وعليكم السلام ورحمة الله وبركاته
يا أحمد أكتب بحرية و من غير حزف، خللي كل الحاجات تنطلق بطبيعتها
أشكر لك إستجابتك لدعوتي و إهتمامك بها و بمدونتي المتواضعة
خالص مودتي
__________________
ghada mOhsen
وماله
مافيش مشكلة
إكتبي عن الرياض أو صنعاء
المهم تكتبي زكرياتك عن المكان و الناس
خالص تحياتي
__________________
medo
على فين يا مصر ؟! ده سؤال يا راجل
على أي حته مهببه طبعا
المشكلة إن كل القيم مسخت في مجتمعنا و أصبحت بلا فائدة أو واقعية
حتى قيم الجمال و القبح ، إتلغبطت و تداخلت
إنت سألت أصعب سؤال ممكن يتسأل
تحياتي
___________________
KING TOOOT

ـ-ـ- أحمد عبد العدل-ـ-ـ said...

ألف سلامة لعمر ياملك
إن شاء الله يقوم بالسلامة ،، و يبارك لكم ربنا فيه و تشوفوه أحسن من ما تحلموا له يارب
حالاً نطمن عليه إن شاء الله :)